July 10th, 2024
काठमाडौं : आफूले स्थापना गरेको कम्पनी एसियाकै सबैभन्दा खराब प्रदर्शन गर्ने स्टक बनेपछि थाइल्यान्डका सोमफोटे आहुनाई अर्बपतिको सूचीबाट बाहिरिएका छन् । थाइल्याण्डको सबैभन्दा ठूलो नवीकरणीय ऊर्जा उत्पादक इनर्जी एब्सोल्युट पीसीएलका संस्थापक अहुनाईको सम्पति २ वर्षअघि ४.६ अर्ब अमेरिकी डलर रहेको थियो । तर आफ्नो कम्पनीलाई टेस्ला जस्तै यातायात विशेषज्ञमा विविधीकरण गर्ने प्रयासहरुको श्रृंखलापछि अहुनाई अब अर्बपति नरहेको ब्लुमबर्गले उल्लेख गरेको छ ।
इनर्जी एब्सोल्युटको सेयरले जुन महिनामा ५१ प्रतिशतको रेकर्ड मासिक गिरावट भोगेपछि सोमफोटेको सम्पति ६० करोड डलरमा सीमित भएको ब्लुमबर्गले लेखेको छ । जुलाईमा कम्पनीको वित्तीय स्वास्थ्यको रक्षा गर्न उग्र कदम चालेपछि सेयर भाउमा ११ प्रतिशत रिबाउन्ड आएपनि यस वर्ष कम्पनीको सेयर भाउ समग्रमा ७० प्रतिशतले घटिसकेको छ । उक्त गिरावट एमएससीआई एसिया प्यासिफिक सूचकांकमा सूचीकृत लगभग १ हजार ४०० कम्पनीहरुमध्ये मध्ये सबैभन्दा ठूलो भएको ब्लुमबर्गले उल्लेख गरेको छ ।
सोमफोटेले आफ्नो कम्पनीलाई धेरै वर्षसम्म इलन मस्कको टेस्ला जस्तै बनाउने प्रयास गरेपछि कम्पनीमा भारी गिरावट आएको हो । उनले टेस्ला जस्तै बिजुली उत्पादन, ब्याट्री उत्पादन, कार निर्माण र चार्जिङ पोइन्ट स्थापनासहित एक एकीकृत व्यवसाय निर्माण गर्ने प्रयास गरेका थिए । सोमफोटेले विद्युतीय रेल, फेरी र बसहरुको एसेम्ब्लीमा पनि लगानी गरे । तर आफ्नो सपना पूरा गर्न ठूलो मात्रामा ऋण लिएपछि कम्पनीको अवस्था नाजुक बन्दै गएको ब्लुमबर्गले लेखेको छ ।
सोमफोटेको इभी उद्योगका सबै प्रयासहरु हाल चलिरहेको मूल्य युद्ध र अत्यधिक आपूर्तिका कारण साथ गम्भीर शंकामा रहेको थाइल्यान्डको लगानीकर्ता संघका अध्यक्ष तिवा सिन्ताडापोङले बताएका छन् । एनर्जी एब्सोल्युटको आम्दानीमा गिरावट र नकारात्मक नगद प्रवाहले लगानीकर्ताहरुको विश्वास घटाएको बताइएको छ । सोमफोटेले कम्पनीको १ अर्ब डलर ऋण तिर्न प्रसस्त नगद प्रवाह रहेको बताएपनि लगानीकर्ताले विश्वास गरिरहेका छैनन् । यद्दपि, ६६४ मेगावाट विद्युत उत्पादन गर्ने क्षमता रहेको परियोजनाको वित्तीय अवस्था भने अझै बलियो रहेको ब्लुमबर्गले लेखेको छ ।









प्रतिकृया दिनुहोस्